قصه حب من اول خناقه

البوليس جه وخد الشباب دول واريام راحت القسم عشان تعمل محضر وحازم راح معاها وفضل واقف معاها لحد ما خلصت كل حاجة وامها واختها نورا جم جري على القسم لما عرفوا باللي حصل ونورا حضنتها وقعدت تعيط وامها قعدت تدعي لحازم وتقول له ربنا يبارك لك يا ابني لولاك كان زمان بنتي راحت فيها.

بعد ما خرجوا من القسم اريام قالت لحازم انا عاوزة اتكلم معاك شوية لوحدنا حازم قال لها طبعا راحوا قعدوا على قهوة قريبة واريام قالت له انا اسفة انا ظلمتك انا كنت فاكراك بتطاردني وبتضايقني وما كنتش اعرف انك بتحميني من بعيد لبعيد حازم ضحك وقال لها ولا يهمك انا عارف ان منظري كان غريب وان اي واحدة مكانك كانت هتخاف بس اعمل ايه بقى من يوم ما شفتك وانتي بتتخانقي في الشارع وانا مش قادر اشيلك من دماغي عجبني عنادك وقوتك وعجبني انك ما سكتيش على حقك وعجبني انك مية راجل في بعض وانا من ساعتها وانا بحاول الاقي طريقة اكلمك بيها وما كنتش عارف.

اريام وشها احمر من الكسوف لاول مرة حازم يشوفها مكسوفة كده وقال لها على فكرة انا اسمي حازم مهندس مدني وساكن في المنطقة اللي جنبكم ولو تسمحي لي يعني انا عاوز اتقدم لك رسمي واتعرف على اهلك اريام بصت له وضحكت وقالت له بسرعة كده انت لسه شايفني بتخانق من كام اسبوع حازم قال لها ما هو ده اللي عجبني فيكي انا عاوز واحدة قوية تقف جنبي وتسندني مش واحدة تعيط على اي حاجة اريام قالت له طب ونورا اختي وامي وسلسبيل صاحبتي لازم يعرفوا الاول حازم قال لها وانا موافق اعرف العيلة كلها حتى جبر وزاهر لو عاوزة.

اريام روحت وحكت لسلسبيل على كل اللي حصل وسلسبيل قالت لها يا لهوي يا اريام مش قلت لك انه حب من اول خناقة ده طلع فيلم هندي بجد اريام قالت لها تصدقي يا سلسبيل اول مرة احس اني مبسوطة اني بتخانق في الشارع لولا الخناقة دي ما كنتش شفته ولا عرفته.

وبعد اسبوع حازم جه هو وجبر اللي كان زي ابوه في الشغل واتقدم لاريام رسمي وامها وافقت لما شافت اد ايه هو راجل محترم وبيحب بنتها بجد ونورا كانت طايرة من الفرح وبتقول لاختها اخيرا يا اريام هتتجوزي واحد يستاهلك وواحد يعرف قيمة عنادك وقلبك الطيب.