قصه حب من اول خناقه

اريام خرجت من المكتبة وشافته واقف افتكرته واقف صدفة فما اهتمتش ومشيت في طريقها للبيت وحازم مشي وراها تاني لحد ما هي لاحظت ان في حد ماشي وراها من ساعة الخناقة وقفت مرة واحدة ولفت له وقالت له انت ماشي ورايا ليه انت عاوز ايه بالظبط حازم اتوتر لاول مرة في حياته وما عرفش يرد وقال لها لا ابدا انا بس ماشي في نفس الطريق اريام بصت له بقرف وقالت له طريق ايه ده شارعنا وانا ساكنة هنا وانت شكلك مش من المنطقة اصلا امشي من هنا احسن لك بدل ما الم عليك الناس زي ما لميتهم على السواق من شوية ومشيت وسابته واقف مصدوم وبيضحك في نفس الوقت.

من اليوم ده وحازم بقى يشوف اريام كل يوم تقريبا هو عرف من صاحب الكشك انها ساكنة في العمارة اللي على اول الشارع وان اسمها اريام وانها بنت جدعة ومتربية وبتشتغل في حضانة الصبح وبتدي دروس للعيال الصغيرة بعد الضهر عشان تساعد امها واختها نورا وحازم بقى يروح يقعد عند القهوة اللي قدام حضانتها ويشوفها وهي داخلة وخارجة وبيسمع ضحكتها وهي بتلعب مع العيال وكل يوم اعجابه بيها بيزيد اكتر.

اريام بقى كانت حاسة ان في حاجة غريبة بتحصل كل ما تخرج تلاقي نفس الشخص اللي شافته يوم الخناقة موجود مرة عند الحضانة مرة عند السوبر ماركت مرة عند المكتبة فبدأت تخاف بجد وحكت لصاحبتها الانتيم سلسبيل وقالت لها يا سلسبيل انا حاسة ان في واحد بيطاردني بقاله اسبوعين كل مكان اروحه الاقيه فيه شكله مجنون ولا ايه سلسبيل اللي كانت بتحب الحكايات الرومانسية قالت لها يا بت يا اريام ده شكله واقع في حبك من اول خناقة زي الافلام اريام قالت لها حب ايه وزفت ايه ده شكله متحرش وانا هعمله محضر في القسم لو فضل كده.

سلسبيل قالت لها استني بس ما تظلميهوش يمكن معجب بيكي بجد وعاوز يكلمك ومش عارف ازاي اريام قالت لها يعجب بيا ايه هو انا اعرفه اصلا ده شافني وانا بتخانق في الشارع وشعري منكوش وصوتي واصل لاخر الشارع حب ايه اللي هيجي من منظر زي ده.

في نفس الوقت ده كان في واحد اسمه زاهر شغال مع جبر المقاول اللي حازم شغال معاه في الموقع زاهر ده كان معروف انه شمال وبتاع مشاكل وبيستلف فلوس من طوب الارض وما بيرجعهاش وجبر كان دايما يحذر حازم منه ويقول له خلي بالك من الواد ده يا حازم الواد ده عينه زايغة وايده طويلة وما لوش امان.